• Periodetitels S.V. Roggel: Truuk van weggewaes

  • Väör de get aojere spelers waal bekèndj, mer väör de jonge voetbalgoden missjien get minder. Nao 'n aantal jaore van aafwezigheid zeen wae dit seizoen zeen weer begos mèt periodetitels bie de SV väör alle senioreteams en de JO-19. Dit beteikentj det waekelijks waerdj biegehaoje waat de teams höbbe gemaaktj en op basis van dees resultate waerdj 'nne óngerlinge rangliest biegehaoje. Aangezeen 't aantal gespeeldje wedstrijde nogal oetein löptj (zoea höbbe de dames pas eine wedstrijd gevoetbaldj terwiel anger teams al 4 kiër aan höbbe mótte traeje), wèrke wae mèt 'n gemiddeldj aantal puntje per wedstrijd oppe rangliest. 't Seizoen is opgedeildj in 4 periodes en in dees periodes gaon de Roggelse teams de strijd aan väör de periodetitel, de biebehuerendje bonne, iëwige roem en 'n wasliest aan felicitaties. Allemaol te óntvange tiejes de seizoensaafsloeting woea de winnaars bekèndj gemaaktj waere. Eder team kèn mer 1 periode winne, dus we kriege altied 4 versjillende winnaars!

    Dus zeetj gae 't seizoen slecht begos, zitj eure keeper d'r 'n paar waeke duchtig naeve, of is de topscorer 'nne sjoeanwaervoetballer en kriege wae 'nne horrorwintjer, niks aanne handj: de volgendje periode kèn gewuen van uch zeen!

    Hie ónger de tussestandj van de iërste periode dae löptj toet de 31e oktoeaber. Roggel 4 en de zunjigveterane zeen in 'n nek-aan-nekrace verwikkeldj óm de iërste plaats, of geit Roggel 3 d'r dalik nog mèt de iërste periodetitel vandoor...? Wae haoje uch vanaaf dees plaats regelmaotig op de huegte. Succes!