• Roggel 2 paktj de derdje periode!

  • 't Is inmiddels mei en det beteikendj det ouch de derdje periode aafgeslaote is. Twië maondj woea door 'n aantal teams hiël väöl wedstrijde gespeeldj zeen (sommige zelfs 10!), mer woea de zunjigveterane slechts 2 wedstrijde höbbe moge spele. Groeate ongerlinge versjille dus, en de winnaar moog zich den ouch periodekampioen neume op basis van doelsaldo en iërder behaoldje periodekampioensjappe van anger teams. Roggel 4 haet 't geweldjig gedaon mèt 5 äöverwinninge in 5 wedstrijde, mer aangezeen dees hiëre de iërste periode al gewonne haaje, geit dees periode nao 't team det 't daonao 't bèste gedaon haet, en det is Roggel 2!

    Woea kumptj deze opmars vanaaf? Nao 'nne slechte start van 't seizoen mèt 3 nederlage op riej höbbe ze de waeg omhoeag inmiddels aardig gevonje en zeen ze truuk te vinje op 'n nette 5e plaats in häör klasse. Ligktj det aan tactische meisterzètte van Frank en Rik, laote de spelers noe eindelijk zeen waat ze in zich höbbe, of mótte wae 't boete 't voetbal zeuke? Teambespraekinge äöver vriepartieje in de mörge, 't teikene van anatomisch correcte oetstaekendje lichaamsdeile van speler en trainer inne rust, of 'n stukske teambuilding in Eindhoven (gelökkig haaje ze de daag daonao vrie, aangezeen 'n aantal spelers weer 'ns meute haaj de taxi truuk nao Roggel te vinje)? Wae zölle d'r waarsjienlijk noeats achter kome, mer in eder geval van herte proficiat mèt de derdje periode!

    Dit beteikentj ouch det de zunjigveterane väör de derdje kiër net naeve de prieze griepe, dit kiër omdet ze 'n minder doelsaldo höbbe as Roggel 2. Dees manne zeen waal nog in de race väör 't kampioensjap en de veerdje periode mót den toch waal väör häör zeen... Wae haope det zuu, net as de anger teams natuerlijk, 't seizoen succesvol kènne aafsloete!