'T is zoea wiet, alle vraoge zeen naogekaeke en wae moge eine winnaar/winnaars gaon oetroope. Alleriërst wille wae eederein bedanke dae de tocht geloupe haet en de vraoge haet ingevuldj, en det woore d'r väöl! Sjiek óm te zeen!
Maar oeteindelik kan d'r maar eine de winnaar zeen. Of toch neet?
In dit geval is 't ein duo det same de tocht haet geloupe. Sten Lemmen en Job Steenvoorden, gefeliciteerdj, gae zeentj de winnaars väör 2021 mèt maarleefst 17 van de 20 vraoge good! Ein sjoean beerpakket samegestèldj door 't Wijnhuis Heythuysen kumptj nao ug toe.
En is 't noe den klaor? Nae zeker neet!
Vanaaf noe zeen namelik de noewe vraoge "live" väör 2022, die door 't scanne van dezelfdje QR-codes weer in te vulle zeen. Gooje raeje dus óm dees sjoean tocht (nog èns) te loupe, te genete van de verhaole en filmkes en missjien dus waal de winnaar(s) te waere väör dit jaor!
